БИШКЕК, 31-май — Sputnik. Бишкекте эл аралык "Наристе" балдар фольклордук V фестивалы салтанаттуу ачылганын мэрия маалымдады.
Фестивалдын максаты — этностук, маданий, тилдик топтордун жана улуттардын ортосундагы мамилени бекемдөөгө, маданиятты байытууга, эл аралык маданий кызматташтыкка жана тажрыйба алмашууга өбөлгө түзүү.
Фестивалга Венгрия, Кытай, Монголия, Болгария, Индия, Казакстан, Түркия мамлекеттеринин, Россиянын Москва, Санкт-Петербург, Новосибирск шаарларынын, Тыва, Татарстандын чыгармачыл жамааттары катышууда. Ошондой эле Кыргызстандын жети облусунан келген эл аралык жана Бишкек Дельфи оюндарынын жеңүүчүлөрү катышып жатат.
Фестивалдын программасы фольклордук бий жана аспаптык ансамблдерди, мастер-класстарды, эл аралык конференцияларды, маданий долбоорлордун презентацияларын жана Бишкектин тарыхый-маданий объектилерине экскурсияларды камтыйт.
1-июнда саат 19:00дө "Ала-Тоо" аянтында фестивалдын катышуучуларынын жана борбор калаанын чыгармачыл жамааттарынын майрамдык концерти өтөт, ошондой эле кече майрамдык дискотека менен уланат.